قصة نجاح: سماح علي عمر – من الشك إلى الاستقرار
الاسم: سماح علي عمر
العمر: 43 سنة
الحالة الاجتماعية: أرملة
الأبناء: بنت وولد

“تزوجت وأنا في العشرين من عمري. كان زوجي يعمل باليومية، ويوم يشتغل ويوم لا. حاولنا نعيش بكرامة، واشتريت مواشي وقدرت أزود عددها شويّة شويّة، لكن المصاريف كانت دايمًا تسبقنا، وما قدرتش أوفر ولا جنيه للزمن.”

“فجأة، زوجي تعب. اكتشفنا إنه مريض بمرض خبيث، ولفينا على المستشفيات، لكن حالته كانت متأخرة، وتوفاه الله. بقيت أنا الأم والأب والمسؤولة الوحيدة عن أطفالي.”

“في يوم، سمعت من الجيران عن مشروع وصالة في جمعية أنا مصري. بعضهم قال: (دي أكيد عملية نصب)، بس أنا قلت: مش هخسر حاجة لو سألت. فعلاً روحت وسألت واتطمنت، وقدمت.”

“اشتركت في المشروع، وخدت قرض بسيط، وضميت عليه مبلغ صغير كنت موفره، واشتريت جموسة. والحمد لله، الجموسة ولدت، وبدأت أبيع اللبن والجبنة والسمنة، وزاد دخلي.”

“النهارده، بقيت قادرة أعلم ولادي، أكلهم كويس، وأصرف عليهم من غير ما نحتاج لحد. وحطيت قرش للزمن… وأثبتّ لنفسي إن مفيش مستحيل.”